Арьсемань, ронгонь лафчепты и ваймонь озафты, инструментальнай, ваймопожфонь (духовнай), Нью–Эйдж и космосонь музыка.

Пара мяльса маладода арьсемань, ронгонь лафчепты   и ваймонь озафты, Нью–Эйдж и космосонь музыкати.

«Гулан тии-максы кулхцондыти потмоёженцты и ваймопожфонцты седиень озафты  и сяконь пингть седиень цебярьста комболфты музыка» Терри Хоук/ Продюсер – 102.3 HFM Radio.

Гулан (Gulan)– тя  Латвияста музыкань сёрмадыть (композиторть) эсь мяленц коряс арьсеф лемоц, кона сёрмады эрь кодама электроннай музыка эмбиент, арьсемань (медитативнай), инструментальнай, космосонь музыка и нью-эйдж стильса. Сонцень афкуксонь лемоц – Андрей Яромир Гуляйкин (англань кяльса Andrei Yaromir Gulaikin). Шачсь Рига ошса 1974 (тёжянь вейхкса сятт сизьгемонь нилеце) кизоня, тонафнесь музыкальнай школаса фортепиано классть коряс, клавишнай электроннай инструменттнень коряс налхкома сявондсь башка урокт ськамонза тонафниень кядьста.  Синтезаторхнень мархта содафтомась и мархтост налхкомась-морамась пильгонек-прянек сувафтозь од музыкантть синтетическяй вайгяльксонь перфпяльти и электроннай музакань  гармонияти.

Сонь сёрматфонза пяшкотьфт мялень салай вайгялькста и простой музыкальнай сюлмафкста, конат кулхцондыть пряс сувафтыхть потмоёжень арьсемат, конат сотфт космость мархта. Сонь музыканц эсь лацоннекс и содамоёфксоннекс тисазь аф содаф-тонатф мелодиянь и синтетическяй  мялень салай вайгяльксне. Гулан лама пингта путсь арьсемань тевти (медитациянь практическяй опытти), а станя жа тяфтама занятиянь ётафтомс кода-бди бокса ащи и сяконь басом сембе ширде ашкоды сёрматфкст (фоновай композицият). Тяфтама музыкась лемневи тяфта жа эмбиент или арьсемань (медитативнай), конань смузец мяльть и ронгть лафчептомаса, штоба перфпяльть эса кодамовок шарьхкодемать сувафтомс-пачфтемс ломанть потмоёженцты. Тя музыкась курокста лезды тёждялгофтомс и лафчептомс пря и лезды стак – улемс-ащемс. Медитативнай (арьсефти) музыка мархта альбомтнень музыкантсь сёрмадсыне башка лия альбомтнень эзда, конат ладяфт-тифт мелодичнай нью-эйдж стильса или космосонь тематикаса. Сёрматфонзон пцтай кафта колмоцекс пялькссна лемтьфт  арьсефти (медитативнай) жанрати.

2004 (кафта тёжятть нилеце) кизоста сявомок  Гуланонь музыкань сёрматфонза аф весть марьсевсть  Alien Air music, а станя жа  Hearts of Spase (радио-синдикат, кона кульфтьсы-маряфтсы косомосонь музыкать 220 (кафта сятт комозьда) лама радиостанцияса 49 (нильгемонь вейхкса) штатса США-нь радиостанцияса, The Cosmic Eye; ARFM, Terry Hawke spacerock & ambient radio – Великобританияса, Happyday New Age Radio – Южнай Кореяса, Inner Spase radio – Хорватияса, Музыка сфер – Белорусьса, Данияса – Electroland (эзонза сувси 15 FM – cтанция Бенилюкс масторхнень эзга), Ison Live Radio – Австралияса, а тяфта жа  интернет-радиоса – Digitally Imported Radio, Нидерланды масторса – TC radioshow  и ламоц лиятнень эса.

Авторть сёрматфонза нолневсть тевс Россиянь, Словениянь, Индиянь, Непалонь, Пакистанонь, Румыниянь телеканалхнень а станя жа театрально-танцевальнай  няфнематнень и драматическяй мюзиклхнень эса.

2006-це (кафта тёжятть котоце) кизоня New Vibes Music (CША) Гуланонь мархта сёрмадыхть контракт нью-эйдж музыкань исполнительхнень «Echoes of Tuvalu» марстонь альбомонь нолдамать коряс, коса кафта композициятне соннет. Тяка жа кизоня август ковста тя альбомсь сатсы 1 (васенце) вастть New Age-репортер (афкуксонь лемоц Zone Music Reporter), кона тиенди альбомонь ваномат (обзорхт) и кочкси плейлистт сембе масторонь 100-да (сядода) лама тематическяй станцияста. 

2015-це (кафта тёжятть кеветиеце) кизоня немецонь лекторсь и Master Key cистемань кураторсь Helmar Rudolph (Хельмар Рудольф) Гуланонь музыканц коряс нолдась CD- и цифровой форматса сборник «Cloudwalk» лем ала. Хелмаронь мяленц коряс: «Мзярда тинь васенцеда марясасть-панчсасть Гуланонь музыкань вайгяльксонзон, синь кода-бди ётайхть пачкант и пачфттядязь видексонь полафтомати (трансформацияти). 

Гулан кирди соткс йогань индийскяй школатнень и вайгяльксонь (звуковой) терапиянь центратнень (Shree Mahesh Heritage, Wellness Vibe Research Center, йогати, рейкти и арьсемати (медитацияти) лия частнай тонафтыень мархта), макссесы тейст эсь сёрматф музыканц медитациянь и ронгонь-пондонь лафчептомань сеансонь ётафнемс, тяфта жа максси лицензият клипмейкерхненди, фильммейкерхненди, поэттненди, декламаторхненди (художественнайста машты лувихненди), видеоблогерхненди, режиссерхненди и кинокурсонь студенттненди эсь проектсост треконь тевс нолдамста – фестивальхнень, дебюттнень, короткометражнай (нюрьхкяняста моли), документальнай фильматнень, видеоклипнень, аудиокнигатнень, буктрейлерхнень, презентациянь, сериалонь и ламоть лиять. Музыкантть треконза Youtub-са ванондозь лама миллион ломань и лама ломань макссихть мялень азомат (комментарийхть), кода профессионалонь, станя и яла сяка (тяфтамка) ломанень каналса. Сонь лемозонза азф лама цебярь и шнама мяльвалда продюсерхнень, радио-диджеень, афсатыксонь азыхнень музыкать ширде (музыкальнай критикнень)  эзда  музыкантть аноклаф-тиф проектонзон коряс.
2020 кизонь июньцта лиси инструментальнай мелодичнай музыкань альбомоц «The Land of the Elves» (Эльфнень масторсна»), коза сувасть авторть тяда инголе апак нолнеф тевс инструментальнай треконза, конат арьсефтольхть 1993 (тёжянь вейхкса сятт вейхксогемонь колмоце) кизоста сявомок 2020 (кафта тёжятть комозце) кизоти самс.

Гуланонь музыкац рамави лац содаф (популярнай) музыкань мишендемать коряс сембе интернет-магазиттнень эса: iTunes, Amazon, Spotify, Shazam, Google Music, Yandex Music, SoundExchange, Napster, Pandora, Deezer, 7Digital, 8tracks, Akazoo, iMusica, InProdicon, KKBox, Kdigital, Line Music, NetEase Cloud Music, Saavn, SoundExchange, Synchtank и стак тов. Мяльс сявома: Музакальнай альбомтне – «Avatara» и «Enliven» сёрматфт аф А. Гуланонь кядяла, а ладяфтольхть лия копозиторхнень кядьса тяфтама жа лем мархта  – Gulan. Уликс афсатыксть и ёшмоть цифровой дистрибуциянь  магазиттне маластонь пингть тяряфтсазь петемс-ладямс.

***

Латвиянь композиторсь А.Гуляйкин содазень эсь юронзон – Мокшень ПРАВДА – 2020 кизонь 2 июльста / 25 (14424)

Марнек масторлангса кизоста кизос касы  сятнень лувкссна, кит вешендсазь шачема юрснон, пуропнесазь генеалогическяй шуфтснон. Ломаттне кепсесазь архивнай документтнень, кизефнесазь сире ломаттнень и мянь тиендихть ДНК-тестт. Генетикась марса историять, антропологиять, археологиять, лингвистикать мархта сотфста кандови инь видексонь и объективнай наукатнень ёткс. Сон арси нажядема вастокс сятненди, кит вешендсазь исследованиянь темать крхкаста шарьхкодеманц. Андрей  Яромир Гуляйкин (космическяй  музыкань кельгихненди  содаф  кода Гулан (Gulan)  Латвияста композитор, кона, тонафнемок Восточнай Европань кунардонь пингонь нароттнень религияснон и этногенезснон,  шарфтсь  мяль  генетическяй  генеалогиять лангс. Тись ДНК-тест эстеенза и тядянц мархта алянцты. Результаттне  ульсть  дивандафтыхть! ДНК-тестсь  няфтезе,  што  генетикань  ширде  синь мокшет. Тяда меле Андреень эвондась оцю мялец содамс Поволжьянь  коренной  эряйхнень—мокшетнень  и  эрзятнень колга семботь. Сон кочкась лама  содамоши минь народоньконь историянц, археологиянц, антропологиянц и  культуранц колга. Козякофтозе информацияса «Мокшане» разделть, кона максф википедияса (интернет-энциклопедияса). Сон примсесь участия интернетса ётафневи диспуттнень эса, коса кирнезе мокшэрзянь народть видексонь историянц ширенц, ашезе  макссе  матрамс  минь  козядонга-козя  культураньконь. Андрей Гуляйкинонь валонзон коряс, сон музе сянь, мезть  юмафтозь  атянь-атянза.  Андрей  маряй  гордость, што сон мокша и што сонь юронза кандовихть кунардонь пингонь плямати, конанди тёжяньда лама киза. Ня  шитнень минь  корреспондентоньке сявсь интервью Ригаса эряй асу мокшень ломанть, музыкантть, композиторть, звукорежиссёрть Андрей Гуляйкинонь кядьста.

— Андрей, тейнек, Мордовияса эряй мокшетненди, тон улят примеркс и сяда пяк сятненди, конат тячемс сёпондсазь эсь национальностьснон.

 — Мон аф шарьхкодьса, кода ломаттне атказакшнихть эсь юрснон эзда. Вдь тядятне-алятне, щятятне-щаватне, атятне-бабатне эсь седи лямбоняснон, кельгомаснон, маштомошиснон макссесазь идьснонды, унокснонды. И тя моли поколенияста-поколенияс. Вов тя лямбонясь (кяльсь, койхне-обуцятне, национальнай щамсь, ярхцамбяльсь) пачкодсь и тейтьке. Эряви улемс эстейть врагокс, штоба атказамс тя козяшить эзда. Эсь лангсот лоткафтомс атянь-атяньконь вийснон, масторлангса улемаснон. 

— Азонтк, пожалуйста, кода тон, мокшень ломанць, шачеть Европаса, Рига ошса? 

— Бабазе, Нина Ивановна Рыбакова, шачемас коре Пензенскяй областень Белинскяй райононь Тарханы велеста. Сон лиссь рьвакс атязти, Владимир Прокопьевич Гуляйкинонди, кона эрясь Казахскяй ССР-са Усть-Каменогорск ошса. 1951 кизоня шачсь алязе. Сонь шачемдонза меле атязе шавовсь, теенза ульсь аньцек 26 киза. И, ужяленди, сембе сотксне Гуляйкиттнень мархта сязевсть.Бабазе пингонь ётазь лиссь рьвакс омбоцеда. Мирдец служась гражданскяй авиацияса и сонь кучезь работама Ригав. Вов тяфта монь радняне повсть Латвияв. Тядязе, Валентина Васильевна Грачунова, кода и бабазе, Тарханы велеста. Синь алязень мархта васедсть Пензенскяй областьса и тозк рьвяясть. Рьвяямда меле алязе сявозе тядязень Ригав, коса шачень мон. Мзярс тядязень мархта алязе вешендсть работа и эряма васта, мон эрянь бабазень ширеса, Тарханы велеса. Тя седиге кельгови уженяса ушедонь якама и корхтама. Меле тядяне-аляне сявомазь Рига ошу, коса эрян тячемс. Тяфта ни лиссь, што касонь руз ломань ёткса. Перьфкан стане жа ульсть латышт, еврейхть, эстонецт, литовецт, полякт, украинецт. Тядяне-аляне эряфоньберьф лувозь пряснон сембе ширде руз ло-манькс. Арьсень содамс сяда лама атянь-атянень и шачема юрснон колга, сяс кучине ДНК-тестоньконь (монценнеть и родительнень) Family Tree DNA американскяй лабораторияв. Результаттне няфтезь, што Гуляйкиттнень родсна кандови финно-угорскяй группань народти—мокшетненди. Тяфта минь содаме эсь афкуксонь юроньконь колга. 

 — Андрей, тон сёрматкшнят музыка. Азонтт аф лама композиторонь тевцень колга. 

— Музыкась салазе мялезень нинге идькс пингстон. Сисем кизоса ушедонь тонафнема фортепианаса морама. Минь кудсонок фалу кайгсь музыкась. Алязе морась гитараса. Сонь ульсь сонцень звукозаписень студияц. Нинге шабакс педезь-педсь эзон электроннай звукненди кельгомась. Мзярда тонафнень Пушкинскяй лицейса, содафтонь пара вайме ломанть, музыкань преподавательть Зигмунд Бриедисонь мархта. Сон тонафтомань синтезаторса аранжировкань тиема. Тяда башка, пара мяльса ванондыне научно-популярнай фильматнень, сяс мес тоса сидеста кайгсть космическяй вайгялькс (звук) мархта мелодият. 80-це кизотнень содафтонь «космическяй эмбиент» музыкань стильть мархта, кона пяк токазе седиезень и салазе мялезень. Тяфтама музыкась эвондафты кулхцондыхть эса космость колга арьсемат. 90-це кизотнень, мзярда улендень йогать коряс тренингса, содафтонь медитативнай музыкать мархта. Сон лезды ломанти лафчептомс пря. Тяфта монь творчествасон шачсть музыкань кафта жанрат: космическяйсь и медитативнайсь. 

Ред.: Гуланонь музыкац ноляви 220-да лама радиостанциява (США-са, Великобританияса, Южнай Кореяса, Хорватияса, Данияса, Австрияса и лия масторхнень эса). Сонь мелодиянзон сявондсазь Россиянь, Словениянь, Индиянь, Пакистанонь, Румыниянь телеканалхне. Синь кайгихть театрально-танцевальнай постановкатнень и мюзиклатнень эса. Ютубса музыкантть треконзон кулхцонкшнесазь миллиотт ломань. Сонь лемозонза азф аф кржа шнама вал продюсерхнень, радиодиджейхнень и критикнень эзда. 

— Ламоц вастова творческяй ломанти стака трямс пря эсь асушинц вельде. Кода тянь мархта ащи тевсь Латвияса?

 — Латвияса, кода и марнек масторлангса, тевсь ащи стане жа. Тиемс творчествать профессиякс, штоба сон кандоль ваймонь петема и ярмак—тя творческяй сембе ломаттнень инь оцю мяльсна. Надиямс, што муви продюсер, кона гайфти и терттянза миллиононь питнеса контрактс, конешна, ули кода, но тяфта лисенди пяк шуроста. Мумс творческяй проектонь эряфс нолдаманкса финансовай ширень кирдема государствать эзда пяк стака. Музыканттне тяни, интернетса работазь, тяряфнихть синць лисендемс международнай рынкав. Тя, конешна, козовок аф кондясти. Сяс мес музыкантти эряви сембе виенц нолямс музыкати, а аф мимань-рамсемань тефненди. Вдь сонь лангсонза ащи оцю ответственность, сяс мес творчестванц вельде кулхцондыти ётай сонь ваймонь и потмоёжень прянь марямац. И сяс композиторти эряви ванфтомс эсь ваймонь арушинц. 

— Тяниень музыканттне ушедсть сяда лама шарфнема мяль народнай фольклорти, кунардонь пингонь музыкальнай инструменттненди, юкстаф койхненди-обуцятненди. Мушенды-аф васта тонь творчествасот кунардонь пингоннесь?

 — Конешна, тя темась пяк мялень салай. Интернетста мон кочкань лама фотографияда национальнай щамса щаф мокшаватнень мархта. Аф кунара Ютубса тиень «Мокшень койхне-обуцятне—музыкась, культурась, народнай стильсь, эрямась-ащемась» плейлист. Седиень таколдозь ванондсайне ня видео-материалхнень, коса корхтайхть и морайхть мокшетне. Хуш кяльть мон аф содаса, и лама мезе аф шарьхкодян, но колсеви седиезе, мзярда няфневихть шава велетне, коса аф кунара нинге лаказь-лакась эряфсь. Режиссёрть Никита Захаркинонь мархта (сон стане жа мокша, монь ичкоздень раднязе) арьсекшнетяма ётамс Мордовиянь и Пензенскяй областень мокшень велетнень эзга и тиемс художественнай фильмань мзярошка серия народоньконь эряманц-ащеманц колга. Штоба мазы перьфпяленьконь, национальнай культураньконь, козя кяленьконь и пара вайме мокша ломаненьконь колга содаль сембе масторсь. Азса нинге сянь, што интернетса мзярс аш сатомшка фото и видеоматериалда мокшетнень колга. Пароль, кда тя тевсь петеволь. Арьсекшнян тиемс цебярь качества мархта фотографият, конатнень улельхть кода нолямс тевс публикациятнень эса, коса азондови народоньконь и сонь культуранц колга. 

— Андрей, сюкпря корхнеманкса и удалаза арьсефце (Т.Петрова).